Hos 9 | NdeIBE | STEP | Ungathokozi, we Israyeli; ungajabuli njengezinye izizwe. Ngoba ube ungathembekanga kuNkulunkulu wakho; uthanda umholo wewule ezizeni zonke zokubhulela.

Hosea 9

Isijeziso sika-Israyeli

1 Ungathokozi, we Israyeli; ungajabuli njengezinye izizwe. Ngoba ube ungathembekanga kuNkulunkulu wakho; uthanda umholo wewule ezizeni zonke zokubhulela.

2 Iziza lezikhamelo zewayini kakuyikunika abantu ukudla; iwayini elitsha lizabehlulekisa.

3 Kabayikuhlala elizweni likaJehova; u-Efrayimi uzabuyela eGibhithe adle ukudla okungcolileyo e-Asiriya.

4 Kabayikuthululela iminikelo yewayini kuJehova, lemihlatshelo yabo kayiyikumthokozisa. Imihlatshelo enje kubo izakuba njengesinkwa sabalilayo; bonke abayidlayo bazangcola. Ukudla lokhu kuzakuba ngokwabo; akuyikufika ethempelini likaJehova.

5 Lizakwenzani ngosuku olumisiweyo lwamadili enu, ngezinsuku zemikhosi kaJehova na?

6 Lanxa bengaphunyuka ekubhujisweni, iGibhithe izababutha, njalo iMemfisi izabangcwaba. Ingcebo yabo yesiliva izathathwa yimbabazane, njalo ameva azagcwala emathenteni abo.

7 Izinsuku zokujeziswa ziyeza, izinsuku zokwahlulelwa sezifikile. U-Israyeli kumele akwazi lokhu. Ngoba izono zenu zinengi kakhulu lenzondo yenu inkulu kakhulu, umphrofethi ubalwa njengesiwula umuntu oholwa ngomoya enziwe njengohlanya.

8 Umphrofethi, ekanye loNkulunkulu wami, ungumuntu olinda u-Efrayimi, kodwa imijibila imlindele kuzo zonke izindlela zakhe, kanye lenzondo endlini kaNkulunkulu.

9 Batshone baphelela ekonakaleni, njengasezinsukwini zaseGibheya. UNkulunkulu uzakukhumbula ukuxhwala kwabo abajezisele izono zabo.

10 “Ekufumaneni kwami u-Israyeli kwakunjengokuthola amagirebisi enkangala; ekuboneni kwami okhokho benu, kwakunjengokubona izithelo zakuqala zomkhiwa. Kodwa ekufikeni kwabo kuBhali Pheyori, bazinikela kulesosithombe esihlazisayo benyanyeka njengaleyonto ababeyithanda.

11 Udumo luka-Efrayimi luzaphapha luhambe njengenyoni – akuyikuba lokuzala, lokukhulelwa, lokuthatha izisu.

12 Loba bangaze bondle abantwana, ngizabemuka bonke. Maye kubo, lapho sengibadelile!

13 Ngimbonile u-Efrayimi, njengeThire, ebekwe endaweni enhle. Kodwa u-Efrayimi uzakhuphela abantwana bakhe phandle kobulalayo.”

14 Baphe, O Jehova – uzabaphani na? Baphe izizalo eziphunzayo lamabele angelalutho.

15 “Ngenxa yokuxhwala kwabo konke eGiligali, ngabazonda khonale. Ngenxa yezenzo zabo eziyizono, ngizabaxotsha endlini yami. Kangisayikubathanda futhi; bonke abakhokheli babo bangabahlamuki.

16 U-Efrayimi udlekile, izimpande zabo zomile, kabatheli zithelo. Loba bengazala abantwana, ngizayibulala inzalo yabo abayithandayo.”

17 UNkulunkulu wami ubalile ngoba kabamlalelanga; bazakuba zinzulane phakathi kwezizwe.